Albisteak

ZUBISUALAK: ILUSTRAZIOA, EUSKARA ETA ANIZTASUNA PRAKTIKAN

2026-01-26

ZuBisualak ez dira soilik ilustrazio tailerrak. Esperimentazio artistikotik abiatuta, euskararen erabilera aktiboa, pentsamendu kritikoa eta kultur adierazpena lantzeko espazioak dira.

Datozen asteetan, Iñaki Martiarena “Mattin” ilustratzaile ezagunak ZuBisualak tailerrak eskainiko dizkie Oarsoaldeko sei euskaltegitako ikasleei. Saioek urtarrilaren 28tik otsailaren 26ra bitartean izango dute lekua, Mintzagun egitasmoaren barruan.

Mintzagun programaren baitan, urtero sei gai lantzen dira, eta gai bakoitza euskaltegi guztietara eramaten da. Helburua argia da: eguneroko gaiak euskaraz lantzea, euskaraz pentsatzea eta euskaraz sortzea, ikasleen esperientziaren erdigunean hizkuntza jarriz.

ZuBisualak tailerrek ideia hori urrats bat harago eramaten dute: irudia eta ilustrazioa erabiliz, ikasleek errealitatea euskaraz interpretatzeko eta adierazteko tresnak lantzen dituzte. Horrela, euskarak ez du soilik komunikatzeko balio; mundua irakurtzeko eta eraikitzeko hizkuntza bihurtzen da.

Ekimen hau bat dator 2030 Agendako 18. Garapen Jasangarrirako Helburuarekin (ODS 18), hizkuntza eta kultura aniztasuna gizarte kohesionatu, sortzaile eta iraunkorren oinarri gisa ulertzen duelako. Hizkuntza bat bizirik mantentzeko, erabiltzea eta sortzea ezinbestekoa da.

Tailerren egutegia:

• 2026-01-28 · Txirrita AEK (Pasai Antxo) - Ordua: 09:30 – 11:00
• 2026-01-29 · Intxixu AEK (Oiartzun) - Ordua: 10:00 – 11:30
• 2026-02-05 · Errenteriako Udal Euskaltegia - Ordua: 09:30 – 11:00
• 2026-02-12 · Oroitzene AEK (Lezo) - Ordua: 10:00 – 11:30
• 2026-02-19 · Xenpelar AEK (Errenteria) - Ordua: 09:30 – 11:00
• 2026-02-26 · Pasaiako Udal Euskaltegia - Ordua: 10:00 – 11:30

• Elkarbanatu: